شسولف منتدانه أجروحي ما تراف --- جرح ينزف جرح يدي جرح جمره
شسولف منتدانه وحالي أرده حال --- يصعب عالعدو وتخنكه اضن عبره
ياجف المسح دمعات مضمومات --- ويابسمه التسّكن آلام المعسره
اطك الروح ويه احساسي راس ابراس --- وريد اتهيد من اجروحي فد مره
لون جان الجرح موش الف اه أو اه --- أترس بي ملح وي ماي المفوره
لوجان الشعر ماينكتب بحساس --- من حك القصيده تعلن الثوره
ملعونه القوافي الماتهز وجدان --- مثل لعنت يزيد أبليلة العشره
أكابر عالزمان وحيلي اسحل بيه ---- أنه أشراع وخوتني الريح بالمسره
اون وما اسمع دوم سفاني --- المهم أيمشي بيه الحال لو فتره
ششكي منتدانه وهم تمل شكواي --- أكلت لأبسفرتك وتغزر السفره
عزمو عالرحيل وباجر ايغيبون --- ونه ابسد الدمع -- هالخاتل أبكتره
امر عالدار باجر ما اشوف اعزاز--- شيموت الكلب شيشيعه ال كبره
أخذني أوياك طيفك ماتشوفه العين --- بنص الليل قلعه .. وخدرك اتسوره
اخذني اوياك مزنه فرح بالصيف --- لا ترجه ولك من صحبتي مطره
اخذني ابخنصرك محبس تباهي الناس --- بيه ولو ردت أبكيفك أتفره
لو جان العمر مابي عشك طرواك --- شجره وما طلع من عدهه أبد ثمره
شسولف منتدانه وهم تداوي اجروح--- ونه أدموعي البجي شو اصبحن حمره
صرت اضحك جذب شمعة فرح للناس --- تضوي وتحترك وتذوب بالحسره
خذت عبره أبحياتي وجربيت الناس --- تظم عنك الحاجه ساعة العسره
لتعاتب صديق الما يهمه اعتاب --- أذا مو من ذاته يشعر بيك لتذكره
مو كله زرع اليطلع أمن الكاع --- هم يطلع نبت للحنظله المره
لا تخجل أذا يوم الجدم زل بيك --- مو عيب اليكوم وما نسه العثره
أخجل لو جحر كرر الك لدغات --- والحيه التلدغك منه لو كره
ماي الوجه هآبالك يخوي اتبيع --- تره الشامت صديق أو ينكشف سره
لون عينك تشوف الشامت أمن ابعيد --- ضم عنه الجرح لآتبين الكسره
موضوع: شسولف يامنتدانا هدية الى اعضاء المنتدى 
الإثنين 10 نوفمبر 2008, 12:53 am
